ព្រះសីហនុ៖ ប្រធានគណបក្សហ៊្វុនស៊ិនប៉ិច ព្រះអង្គម្ចាស់ នរោត្តម ចក្រាវុធ បានចាប់ផ្ដើមយាងចុះសំណេះសំណាលជាមួយសមាជិកបក្សជាលើកដំបូងបន្ទាប់ពីទទួលបានការបោះឆ្នោតជ្រើសតាំងជាប្រធានថ្មីនៃគណបក្ស។

នៅថ្ងៃទី១១ ខែកុម្ភៈនេះ ព្រះអង្គម្ចាស់ នរោត្តម ចក្រាវុធ បានយាងចុះទៅកាន់ខេត្តព្រះសីហនុ ដែលពេលព្រឹកព្រះអង្គជួបជាមួយថ្នាក់ដឹកនាំអ្នកគាំទ្រក្នុងស្រុកព្រៃនប់ និងពេលរសៀលនៅទីស្នាក់ការក្រុងព្រះសីហនុ។

មានព្រះបន្ទូលទៅកាន់អង្គពិធី ព្រះអង្គម្ចាស់ ព្រះប្រធានគណបក្ស បានថ្លែងនូវការកោតសរសើរ ចំពោះ ទឹកចិត្តដ៏អង់អាចក្លាហានរបស់ សហជីវិនសហជីវិនី ដែលបានចូលរួមយ៉ាងសកម្ម ជាមួយគណបក្សហ៊្វុនស៊ិនប៉ិច និងបានដង្ហែតាម សម្តេចក្រុមព្រះ ជារៀងរហូតមក។ ព្រះអង្គក៏បានបន្តអំពាវនាវ ឱ្យថ្នាក់ដឹកនាំក្នុងខេត្ត ត្រូវប្រមែលប្រមូលអ្នករាជានិយម សីហនុនិយម រណឫទ្ធិនិយម រួបរួមគ្នា សាមគ្គីគ្នា ដើម្បីគណបក្សហ៊្វុនស៊ិនប៉ិច ទទួលបានជោគជ័យសារជាថ្មីផងដែរ។

ព្រះអង្គម្ចាស់ នរោត្តម ចក្រាវុធ ត្រូវបានសមាជិកគណបក្សហ៊្វុនស៊ិនប៉ិចបោះឆ្នោតជ្រើសតាំងជាប្រធានបក្សជាផ្លូវការក្នុងអង្គសមាជនៅព្រឹកថ្ងៃទី៩ ខែកុម្ភៈ បន្តវេនពីសម្ដេចក្រុមព្រះ នរោត្តម រណឬទ្ធិ។

ព្រះអង្គ គឺជាបុត្រាច្បងរបស់សម្ដេចក្រុមព្រះនរោត្ដម រណឫទ្ធិ និងព្រះអង្គម្ចាស់ក្សត្រី នរោត្តម ម៉ារី ត្រូវបានតែងតាំងជាព្រះប្រធានស្ដីទីនៃគណបក្សហ៊្វុនស៊ិនប៉ិច នាថ្ងៃទី៨ ខែសីហា ឆ្នាំ ២០១៨៕